ලිංගික අධ්‍යාපනය - 1

මෙය කොටස් දෙකකින් මුදා හැර ඇති අතර පළමු කොටසින් ලිංගික අධ්‍යාපනය ගෝලීය වශයෙන් බිහිවීම හා ව්‍යාප්තිය ගැනත් දෙවන කොටසින් ලංකාවේ ලිංගික අධ්‍යාපනය කෙසේ විය යුතුද යන්න ගැනත්ය.

ලිංගික අධ්‍යාපනය ගෝලීය වශයෙන් බිහිවීම හා ව්‍යාප්තිය ගැන

  ලිංගික අධ්‍යාපනය

    සාම්ප්‍රදායිකව බොහෝ රටවල නව යොවුන් දරුවන් අතරේ ලිංගික කාරණා පිලිබඳ කිසිඳු තොරතුරක් නොගැවසුණු අතර මේ ගැන සාකච්ඡාවද තහනම්ව පැවතිණි. එනමුත් කුඩා වියේ ගැබ් ගැනීම්, දැනුවත් භාවය, රෝග වැළැක්වීම යන කාරණා මත ලිංගික අධ්‍යාපනය හෝ දැනුවත් කිරීම යන අදහස, මතය ආරම්භ වන්නේ 1912 ගණන්වලදීය. ඊටත් දසක කිහිපයක් ගිය තැන මේ මතය අධ්‍යාපන ප්‍රතිසංස්කරණ වෙත යොමුවීම හා ඇරඹීම සුදුවුනි (නිවැරදිවම කාල වකවානු දැක්වීම අපහසුය). 1940 දී එක්සත් ජනපද මහජන සෞඛ්‍ය සේවය පාසල් වලට ලිංගික අධ්‍යාපනය ඇතුල් කිරීම පිලිබඳ දැඩි උනන්දුවක් පෙන්විය. 1953 දී ඇමරිකාව පුරා වැඩසටහන් දියත් කළේය. උතුරු ඇමරිකානු කොටසේ විෂය මාලාවක් ලෙස ‘සමාජ සනීපාරක්ෂාව’ හඳුන්වාදීමත් සමග පාසල් පදනම් කරගත් ලිංගික අධ්‍යාපනය 19වන සියවසේ අග සිට අද දක්වා ලොව පුරා මෙය ව්‍යාප්ත විය.

ඔවුන් එරට අධ්‍යාපනයට මෙය විෂයක් ලෙස ගෙන එන්නට හේතු වූ කරණා පෙලක් -

1 වැඩිවියට පත්වීමේදී සිරුරේ හා මානසිකව වන වෙනස්කම් වලට මුහුණ දීමට හා කායිකව පෙරට වඩා පිරිසිදු බව (විශේෂයෙන් ලිංගාශ්‍රිතව) පවත්වා ගැනීම

2 ගැහැණු ළමුන් හට ඔසප් චක්‍රය ඇතුළු ඒ සිදුවීම් තේරුම් කර දීම හා ඒවායේදී ගත යුතු පියවර

3 ලිංගික අතවර (කායිකව හා වාචිකව) යනු මොනවාද හා ඒවායින් මගහැර සිටීම හා විරුද්ධ වීම හා ඒ මොහොතේ ගත යුතු ක්‍රියා පෙන්වාදීම

4 විශේෂයෙන් ඖෂධ නොමැති ඒඩ්ස් වැනි ලිංගිකව සම්ප්‍රේෂණය වන රෝග සමාජයේ පැතිරීම ඇහිරීම හා ඒ රෝග බෝ වන ආකාරයන් තේරුම්කර දීම

5 ගැබ් ගැනීම් වලකා ගැනීම හා ලිංගික ඇසුර හැකි තරම් පමා කිරීමට යෝජනා කිරීම

6 යෞවනියන් ලිංගික අත්හදා බැලීම් වලට (ස්වයං හා විරුද්ධ කෙනා සමග), ලිංගික එක්වීම් වලට පෙලඹෙන නිසා එය සුරක්ෂිත හා ආරක්ෂාකාරීව කිරීමට කියාදී

දසක කිහිපයකට පෙර තිබූ සමාජය වෙනස්වෙමින්, ගොලීකරණය වෙමින් සමාජ දිශානතිය වෙනස් ගමනාන්ත වෙත ගමන් කරමින් තිබේ. බටහිරින් පටන් ගෙන මුළු ලොව සමාජයන් දක්වා ඇතිව ඇති මේ වෙනස්කම් යෞවනයට හා එදා ඉපදුණ අත දරුවාටද එක සේ බලපෑවේ ය. ඒ නිසා පෙර තිබූ පාසල් තුළ තිබූ ලිංගික අධ්‍යාපන විෂය තුලට ඇතුල්විය යුතු නව කරුණු හා තොරතුරු රැස් කරමින් පරීක්ෂකයින්, අධ්‍යාපනඥයන් හා රජයන් වත්මන් ලිංගික අධ්‍යාපන විෂය පථය අරුත්බර, ඵලදායි කරගන්නා ආකාරය පිළිබඳ නිරතුරු පසුවිපරම් කරයි.

බටහිර ඇතුළු පිට රටවල සමාජ විපර්යාසත් සමග වත්මන් යොවුන් අධ්‍යාපන තත්වය

· ආගම් ක්‍රියාවලිය හා යුද්ධ මත - ආගමික දැක්වීම් සමාජය විසින්ම වෙනස්කර ගැන්ම හා බලෙන් ආගම වෙනස් කිරීම හා යුධ ආක්‍රමණ, යුධ බලය මත බලෙන් වෙනස් ආගමක් ඇදහීමට පැටවීම තුලින් සමාජයේ ඇතිවූ වෙනස

· ධනවාදය, ලිබරල්වාදය, විශ්ව ගම්මානය වැනි සංකල්ප හා දර්ශන න්‍යායන් බිහිවීමෙන්

· කාර්මික විප්ලවය, වානීජ්‍යකරණය වැනි දේ තුලින් සමාජයේ ආර්ථික ක්‍රියාවලියට සිදුවූ බලපෑම

· අන්තර්ජාල ව්‍යාප්තිය, වැඩිහිටි හා කාමුක මාධ්‍ය කලාවක් ව්‍යාප්ත වීම   

මේ අයුරින් විවිධ පැතිකඩ සලකා බැලීමේදී පෙර තිබූ සැහැල්ලු, සරල ජන ජීවිතයක් වෙනුවට අද සංකීර්ණ, විස්තීර්ණවූ සමාජයකට අප සියලුදෙනා හිමිකම් කියනා බව පෙනේ. මේ විපර්යාසය පිටුපස ධනවාදී වෙළඳන්ගේ හස්තයත්, බලය හොබවන පාලක පන්තියත් සැඟව සිටි. විශේෂයයෙන් ලිබරල් මතවාදත් සමග නිදහස් ලිංගික මතයක් දරන මේ රටවල් තුළ මාධ්‍ය, කලාව මෙන්ම ජනප්‍රිය සංස්කෘතිය තුලද වත්මන් පරිසරය අතිශය කාමුක ස්වරුපයක් ගෙන ඇත. විකෘති ආශාවන්, අධිපාරිභෝගවාදී මානසිකත්වයන් තුලින් ඉටු කර ගන්නට යෑමෙන් වන විනාශය සමාජය විපරීත කර ඇත.

ඉතින් නව සමාජ තත්වය සමග අද දවසේ ඇමරිකා, බ්‍රසීලය, අයර්ලන්තය, බ්‍රිතාන්‍ය, කැනඩාව, නවසීලන්තය, ඉරානය, ස්වීඩනය, ඔස්ට්‍රේලියාව, ජපානය, ඉරානය, එංගලන්තය හා බොහෝ අප්‍රිකා ඇතුළු අනෙකුත් රටවල් මේ  ඉහත පෙන්වූ කරුණු 6 ට එහා ගිය පරාසයකට අවධානය යොමු කරමින් ලිංගික අධ්‍යාපන පිළිබඳ පරීක්ෂණ, වැඩමුළු, නිරීක්ෂණ, තරුණ එකමුතු සංවිධානය කරමින් මේ විෂයට නවමු දේ එකතු කර ඇත හා එකතු කරමින් සිටි. ඒ වගේම මේ සමග ලිංගික අධ්‍යාපන (Sex education) යන යෙදුම වෙනුවට ‘ලිංගික හා සම්බන්ධතා අධ්‍යාපනය (Sex and Relationship Education) , විස්තීරණ (පුළුල්) ලිංගික අධ්‍යාපනය (comprehensive sexuality education) යන යෙදුම් වත්මනේ පැමිණ ඇත.

වත්මන් විෂය ක්ෂේත්‍රය අවදානය ලක්වූ කරනු කිහිපයක් -

· කුඩා වියේ සිට කායික හා වාචික අතවරයන්ට ලක්වීම සමාජයේ බහුලව ව්‍යාප්ති වීම

· කුඩා වියේ සිට දරුවන් තම විරුද්ධ ලිංගිකයින් සමග ලිංගිකව එකතුවන්නට වැඩි වශයෙන් පෙළඹීම

· එක් සහකරුවකු ඉක්මවා ලිංගිකව හැසිරීමේ වර්ධනය (සමූහ ලිංගික ක්‍රියා)

· සමලිංගික ඇබ්බැහියේ වර්ධනය

· ගැබ් ගැනීම් හා ලිංගික රෝග ව්‍යාප්තියේ වර්ධනය

· කුඩා වියේ සිට මත්ද්‍රව්‍ය, මත්පැන් හා මත්වැටි පාවිච්චියේ වර්ධනය

මේ හා තවත් කාරණා ඇතුළුව පර්යේෂකයින් නව ලිබරල් සමාජයේ සිටින යෞවනයන්ගේ ලිංගික සෞඛ්‍ය ශක්තිමත් කිරීමට, ආරක්ෂාකාරී ලිංගික ක්‍රියා වර්ධනය කිරීම, කොන්ඩම් භාවිතයට දිරිමත් කිරීම, එක් සහකරුවකු පමණක් ආශ්‍රයට යෝජනා කිරීම, සමූහ ලිංගික ක්‍රියාවලට නොයෑමට උපදෙස් දීම, අතවරවලින් බේරෙන ආකාරය හා කුසලතා ආකල්ප වර්ධනයට, ගෞරවනීය ලෙස සමාජ සම්බන්ධතා පවත්වා ගැනීමට, සාරධර්ම වර්ධනය, යහපැවැත්ම, චිත්තවේග පාලනය, ප්‍රජනන අයිතීන් තේරුම්ගනීම, තෘප්තිමත් ජීවිතයකට සුදානම් කිරීම ඇතුළු බොහෝ දේ නව ලිංගික අධ්‍යාපන විෂය ක්ෂේත්‍රයට ඇතුළත් කර තිබේ. ඒ වාගේම බටහිර රටවල රජයන් විසින් මේ අධ්‍යාපන ප්‍රතිසංස්කරණ, පරීක්ෂණ, ගවේෂණ වලට හා එඩ්ස් වැනි ප්‍රතිජීවක ඖෂධ නොමැති බෝවන ලිංගික රෝග ප්‍රචාරය අඩු කිරීමට මෙන්ම ලිංගික හිංසනය හා ගැබ් ගැනීනීම් මගින් ඇතිවන සමාජීය, මානසික මෙන්ම ආර්ථික අපහසුතා වර්ධනය දුරු කිරීමට ඒ රටවල් රාජ්‍ය ආදායමෙන් සැලකිය යුතු කොටසක් යොදවයි.

මේ සියල්ල මගින් ඔවුනට අවශ්‍ය සමාජ සම්බන්ධතා නිවැරදිව ගෙනයන, යහපත් සමාජයක්, සෞඛ්‍යමත් සමාජයක් බිහි කිරීමයි. එමගින් මානසික, සාමාජීය හා ආර්ථිකමය අංශයන් වලට සිදුවන අනාගත යහපත් සමාජීය වෙනස්කම් ලඟා කරගැනීම අපේක්ෂා කෙරේ.

*********************************

මේ සියලු දේ සලකා බැලීමේදී පෙනී යන්නේ අවරයට යන සමාජය දේහය යහ මගට ගැනීමට ඔවුන් බොහෝ දේ කරණා බවත් ය. නමුත් ඊනියා නිදහස් හා කාමුක පරිසරයක් තුළ මේ ඉලක්කයන් සපුරා ගැනීම හරිම අපහසු බව ඔවුන්ද පිළිගනී. එසේ කියා අධ්‍යාපන ප්‍රතිසංස්කරණඥයින් හා සමාජ පර්යේෂකයින් තම ක්‍රියාව අතහැර නැත.

පාසල් අධ්‍යාපනය පදනම් කරගත් පර්යේෂකයිගේ නව වාර්තාවල දැකිය හැකි කරුණු කිහිපයක් පහතින් දක්වා ඇත. එයින් අපට මෙවැනි පරිසරයක් තවමත් නැතිමුත් ඇතිවෙමින් තිබෙන රටක ලෙස අප පාසල් අධ්‍යාපනය තුලින් මේ සඳහා ගතහැකි පියවර මොනවාද හා අප පාසල් ලිංගික අධ්‍යාපන ක්‍රමය කෙසේ විය යුතුද යන්න තේරුම් ගත හැක.

· ළමුන් ලිංගිකත්වයට අසාමාන්‍ය ලෙස වර්ධනයක් පෙන්නුම් කරයි

· අඩු අධ්‍යාපන, අඩු ආර්ථික මට්ටම් ඇති පවුල් වල හා උසස් අධ්‍යාපනයක් නොලබන ගැහැණු ළමුන් ඉහළ යෞවන උපත් අනුපාතයක් පෙන්නුම් කරයි

· යොවුන් ගැබ් ගැනීම් මත අධ්‍යාපනය කඩාවැටීම, විරැකියාව, මානසික පීඩන වැඩිවීම සිදුවේ

· ලිංගික අධ්‍යාපනය දීම, දැනුවත්භාවය මත යොවුන් ගැබ් ගැනීම් අනුපාතය සැලකිය යුතු තරමක් පහත වැටී ඇත

· 1993 එක් ඇමරිකානු අධ්‍යනයක් පෙන්වන්නේ උසස් පාසල් සිසුන්ගෙන් 5/1ක් ලිංගික හිරිහැර විඳ ඇති බවයි

· පාසල් බස් රථයේ පළමු ශ්‍රේණියේ දියණියකට 4 වසරේ ළමුන් අසභ්‍ය වචන කියා කායික ක්‍රියාවකට එන ලෙස ඇරයුම් කර ඇත. (හාදුවක්, ස්පර්ශයක් වාගේ)

· යෞවන සමාජ මිතුරු හලක් අරඹා එමගින් සමූහ කාමුක ක්‍රියා අත්හදා බැලීම් සිදුකර ඇත

· විවිධ රටවල් 10 ක අධ්‍යනයකින් පෙනී යන්නේ පාසල් ළමුන් ලිංගිකත්වය පිළිබඳ උගන්වන ආකාරයට අකමැති බවයි. (තම පාසලේම ගුරුවරයෙක් සහභාගිවන නිසා, විද්‍යාත්මක හා සායනික ආකාරයක් ගත් නිසා)

· ගුරුවරයන්ද දුර්වල පුහුණුව හා ලජ්ජාශීලී බව හමුවේ සිසුන් ඉදිරියේ අපහසුතාවට පත්වේ හා ගුරු සිසු සබඳතා වියැකේ. මේ හේතු නිසා ගුරුවරුන්ද මේ විෂය මග හරී

· සිසුන් ලිංගික ක්‍රියාවලට පෙලඹෙන බව කීමට මැලිවන නිසා සමහර පරීක්ෂණ නිසි අයුරින් කිරීමට දුෂ්කර විය

· සමහර රටවල ගැහැණු ළමුන් 3/2ක් ඔසප් වීම ඇරඹීමත් සමග කරන්නේ කුමක්දැයි යන්න ගැන තේරුමක් නැත

 

මෙහි 2 කොටස වන ලංකාවේ ලිංගික අධ්‍යාපනය කෙසේ විය යුතුද යන්න ගැන බලන්න.